Die Solidariteit Beweging het ’n nuwe inisiatief van stapel gestuur wat ten doel het om buitelandse steun vir die werk wat die onderskeie instellings van dié beweging doen, te versnel. Die Afrikanerstigting sal veral daarop toegespits wees om internasionale steun en erkenning te kry vir Afrikaners se strewe om vry, veilig en voorspoedig, en in wedersydse erkenning en respek vir en met ander gemeenskappe aan die suidpunt van Afrika voort te bestaan. In hierdie verband sal die klem veral gelê word op die werk wat die onderskeie instellings van die Solidariteit Beweging doen. Die Afrikanerstigting se werksaamhede sal nie net op steunwerwing toegespits wees nie, maar dit sal ook as platform dien waardeur Afrikaners meer aktief aan die internasionale gesprek oor die beskerming van gemeenskappe en die behoud van tradisie kan deelneem.
Dr. Ernst Roets, beleidshoof van die Solidariteit Beweging, sal ook as uitvoerende direkteur van dié stigting optree. “Die tyd is ryp vir Afrikaners om weer hul regmatige plek in die internasionale gemeenskap op te neem,” het Roets verduidelik. “Ons ervaring is dat daar al hoe meer mense oor die wêreld heen is wat toenemend bekommerd raak oor die situasie in Suid-Afrika, maar wat terselfdertyd ook ʼn bydrae wil lewer om Afrikaners in hul strewe na ʼn vry, veilige en voorspoedige toekoms te ondersteun. Natuurlik werk ons nie om Afrikaners te isoleer nie, maar juis vir die teenoorgestelde – om toenemend brûe te bou na enige persoon of gemeenskap met wie saamgewerk kan word. Die Afrikanerstigting sal dus ʼn voertuig wees waardeur steun gewerf word, maar ook waardeur verhoudinge versterk en samewerking bevorder word.”
Die stigting se aktiwiteite sal daarop ingestel wees om daadwerklike steun uit die buiteland te mobiliseer, wat samewerkingsooreenkomste met buitelandse instellings en beleidsverklarings deur buitelandse state insluit. Daarmee tesaam sal fondswerwing vir bepaalde projekte ʼn belangrike fokusgebied van die Afrikanerstigting wees.
Die geleentheid was nog net ʼn voorlopige bekendstelling, in dié sin dat die fokus hoofsaaklik op die handelsmerk, webblad en voorlopige aktiwiteite van die Afrikanerstigting geval het. ʼn Meer amptelike bekendstelling sal later volg.
Sprekers wat by die bekendstelling opgetree het, was:
- Flip Buys, voorsitter van die Solidariteit Beweging, wat ʼn oorsig gegee het oor die omvang van die Solidariteit Beweging se projekte en die noodsaak van buitelandse steunwerwing;
- Jaco Kleynhans, hoof van internasionale skakeling by die Solidariteit Beweging, wat ʼn oorsig gegee het oor wendings in die internasionale politiek, die geleenthede wat hierdeur vir die Solidariteit Beweging ontsluit word, en die rol wat Afrikaners in hierdie verband kan speel; en
- Ernst Roets, beleidshoof van die Solidariteit Beweging en uitvoerende direkteur van die Afrikanerstigting, wat meer besonderhede oor die voorgenome bedrywighede van die Afrikanerstigting verskaf het.
Die toesprake van al drie hierdie sprekers is beskikbaar op die webblad wat so pas bekendgestel is: www.afrikaner.org. Video-opnames sal ook op die Afrikaner Stigting se YouTube-kanaal gepubliseer word. Diegene wat in die werk van die Afrikanerstigting belangstel, kan solank op die nuusbrief op dié webblad inteken.
